Ohin, Quarta-Feira 21 Outubro 2026 – Ministériu Defeza, liu husi S. E. Ministru Defeza Interino, Kay Rala Xanana Gusmão atuál Primeiru-Ministru, hala’o enkontru Bilaterál ho S. E. Vise-Primeiru Ministru no Ministru Defeza Austrália, Honorable Richard Marles, MP., iha Edifísiu Ministériu Defeza Fatu-hada, Díli.

Iha enkontru ne’e, S. E. Ministru Defeza Interinu Kay Rala Xanana Gusmão hodi Ministériu Defeza no Governu nia naran hato’o bem-vindu ba Vise-Primeiru Ministru no Ministru Defeza Austrália ho nia delegasaun ne’ebé mai vizita Timor-Leste, ne’ebé ho komitmentu kontinua hametin kooperasaun iha domínio Defeza.

Aleinde ne’e, atual Xefe Governu ne’e mós hato’o nia apresiasaun ba Governu Austrália ne’ebé ho komitmentu kontinua apoia Timor-Leste iha área oi-oin, liu-liu ba kapasitasaun rekursu umanu, mobilidade laboral, agricultura no servisu importante sira ne’ebé kontinua realiza hamutuk ho governu Timor-Leste.

Durante enkontru, Governu Timor-Leste liu husi husi Ministériu Defeza no Governu Austrália representa husi Departamentu Defeza Austrália asina mós akordu kooperasaun iha domíniu Defeza entre país rua hodi hametin liu tan lasu amizade entre povo husi rai rua.

Akordu foun ne’e foka ba kooperasaun internacional iha domínio Defeza ne’ebé projeta prioridade no objetivu sira husi kooperasaun bilateral no oinsá bele kontribui ba estabelesimentu parseria entre país amigu sira hodi bele dezenvolve atividade sira hamutuk.

Atividade sira ne’ebé prevista iha Kuadru kooperasaun ne’e, inklui formasaun, edukasaun no kapasitasaun ba pessoal militar sira; realizasaun ba ezersísiu no atividade treinu konjuntu; dezenvolvimentu infraestruturas; apoiu umanitáriu no desastre naturais; atividade interkámbiu akadémiku no cultural; no mós área sira seluk ne’ebé importante ba dezenvolvimentu forsas armadas entre rai rua nian.

iha enkontru bilateral ne’e S. E. Ministru Defeza Interino Kay Rala Xanana Gusmão mós expressa nia vontade ba invetimentu rekursu umanu iha ne’ebé bele bele reforsa liu tan instituisaun Estadu iha futuru.

Husi sorin seluk, S. E. Vise-Primeiru Ministru no Ministru Defeza Australia, Honorable Richard Marles mós apresia ba servisu sira ne’ebé país rua ne’e hala’o hamutuk ona. No rekoñese katak, parseria entre rai rua ne’e importante atu bele dezenvolve diak liu tan.

S. E. Vise-Primeiru Ministru no Ministru Defeza Australia, Honorable Richard Marles mós apresia ba relasaun amizade entre Timor-Leste no Austrália no kompromete atu bele servisu hamutuk diak liu tan ba interesse povu Australia no Timor-Leste nian ba futuru.

Enkontru ida ne’e la’o amigavel tebes no parte rua iha ambisaun hakarak servisu hamutuk hodi garante seguransa, paz no estabildiade iha nível rejional no global.

Partisipa mós iha enkontru bilateral refere mak S. E. Ministru dos Negócios Estrangeiros e Cooperação, Bendito dos Santos Freitas, S. E. Ministru Justiça Dr. Sérgio Hornai; Embaixadora Austrália iha Timor-Leste; S. E. Chefe do Estado Maior das Forsas Armadas, Tenente-General Domingos Raul ‘Falur Rate Laek’; Diretór-Geral Política da Defeza, Nuno Carvalho dos Santos; Instituisaun sira ne’ebé tutela ba seguransa no defeza.

Rekorda mós katak, testemuña ba Assina akordu Kuadru Kooperasaun iha Domínio Defesa ne’e hetan mós partisipasaun husi Corpo Diplomático sira ne’ebé acreditado iha Timor-Leste.

Média MD