Ohin, Quinta-Feira 29 Outubru 2026 - S. E. Ministru Defeza, Kontra-Almirante Donaciano Costa Gomes 'Pedro Klamar Fuik', Ph.D., partisipa iha sesaun solene ba abertura primeiru kursu vestibulár ba Academia Militár Conjunta ba ano letivu 2026-2027, iha Campus Academia Militár Conjunta, munisípiu Aileu.

Iha intervensaun S. E. Ministru Defeza, Kontra-Almirante Donaciano Gomes haktuir kona-ba prinsípiu no Doutrina militár ne'ebé atu orienta pessoal militár ida enkuantu hanesan servidór da pátria ba Primeira kadetes Academia Militar Conjunta iha Campus Aileu.

S. E. Ministru Defeza subliña katak ezisténsia Academia Militár Conjunta hanesan guardiaun ba doutrina F-FDTL nian tan ne'e hanesan Ministru Defeza asume responsabilidade perante Estadu no perante povu hodi forma futuru lideransa ba Instituisaun F-FDTL.

S. E. Ministru Defeza apela ba kadetes foun, korpu dosentes no ema hotu ne'ebé responsável ba Academia ida ne'e atu kontinua transmiti valores no doutrina F-FDTL nian, nune'e garante forsa ida ne'ebé kredível no hetan respeitu husi ema hotu.

Husi sorin seluk, S. E. Vice-primeiru Ministru II, Mariano Asanami Sabino felisita S. E. Ministru Defeza Pedro Klamar Fuik, ba lisaun no inisiativa hodi fó importánsia ba formasaun ba ofisiais superiores sira; liu-liu ba valores sira ne'ebé sei guia pessoal sira husi instituisaun forsas armadas Timor-Leste nian.

Vise-Primeiru Ministru II ne'e realsa katak, Timor-Leste presiza iha ofisiais sira ne'ebé preparadu ba dezafiu sira ohin no futuru nian, maibé mós mane no feto formando sira ne'ebé hatene serbí, lidera no hatene fó ezemplu.

"Ida ne'e mak importánsia husi kombinasaun koñesimentu, kompeténsia no valores sira ne'ebé distingue ofisiais superiores F-FDTL iha futuru", dehan VPM-2 iha nia intervensaun durante sesaun abertura ba ano letivu 2026-2027.

Partisipa mós iha serimónia abertura ne'e mak: Vice-CEMGFA, Major-General Calisto Santos "Koliati", Provedoria dos Direitos Humanos, Comissário CAC, Família husi cadetes foun sira, Comandantes Componentes no unidades husi F-FDTL, autoridade polícia, no komunidade husi munisípiu Aileu.

Média MD