Ohin, sexta-feira 06 novembru 2026 - Ministériu Defeza, liu husi S. E. Ministru Defeza, Kontra-Almirante Donaciano Costa Gomes 'Pedro Klamar Fuik', Ph.D., hala'o enkontru kortezia ho Embaixadór Fransa ba Indonésia, Timor-Leste no ASEAN, Fabien Penone, iha edifísiu Ministériu Defeza Fatuhada, Díli.

Enkontru ne'e ho objetivu atu estabelese kooperasaun entre Timor-Leste no Fransa iha domíniu Defeza.

Molok hasoru malu ho S. E. Ministru Defeza Repúblika Demokrátika Timor-Leste, Embaixadór Fransa Fabien Penone mós hasoru malu ona ho S. E. Presidente Repúblika, Dr. José Ramos-Horta no S. E. Primeiru-Ministru Kay Rala Xanana Gusmão hodi hato'o intensaun atu hametin kooperasaun iha setór Defeza no seguransa nian.

Iha vizita ne'e, Embaixador Fransa mós afirma sira-nia komitmentu atu apoia Timor-Leste hanesan membru ASEAN liu-liu husi pontu de vista global no rejional oinusá mak Timor-Leste nia adezaun ba ASEAN ne'e bele sai seguru liu em termus de seguransa no defeza.

Embaixadór Fransa ne'e mós subliña katak kooperasaun entre Timor-Leste no Fransa iha domíniu da Defeza ne'e importante teb-tebes tanba ne'e mak Fransa iha komitmentu atu estabelese kooperasaun iha área formasaun, ezersísiu, vizita navios, kapasitasaun rekursus umanos no área relevante sira seluk.

Haré ba valores komún ne'ebé país rua ne'e partilha, Fransa mós iha expetativa atu aprende valores fundamentál sira tan ne'e mak embaixador Penone reafirma nia komitmentu atu bele estabelese kooperasaun iha tempu badak.

Haré ba situasaun global no rejionál ne'ebé volatil teb-tebes, Timor-Leste kontinua reafirma nia pozisaun katak, Timor-Leste laiha aliado no laiha inimigu; apenas rai hotu-hotu ne'e amigu de'it no kontinua fiar ba diplomasia no diálogu mak dalan diak liu ba solusiona konflitu.

Partisipa mós iha reuniaun ne'e mak Diretór Geral Polítika Defeza Nasionál, Nuno Carvalho dos Santos, Xefe Gabinete Interina, Suzi Lobato, Comandante Duarte Borgues Loe, Asesosa rujídika, Beatriz Nogueira no ekipa husi embaixada Fransa.

Média MD