MAGAZINE MD#Edisaun_II#Free download.

PR Fó Promosaun Postu Ofisiál Jeneral no Jenerais Ba F-FDTL

DILI: Palásiu Prezidensiál Nicolau Lobato, ohin 25 fevereiru 2021 sai sasin serimónia promosaun ba Postu Ofisiais Jeneral no Jenerais Falintil-Forsa Defeza Timor Leste (F-FDTL),  oferese direita husi Prezidente Repúblika, Francisco Guterres Lú Olo, hafoin simu proposta husi Governu no rona Konsellu Superior Defeza no Seguransa.

Dekreta promosaun ba ofisiais ba’in haat (4) mak hanesan:

  1. Coronel Calisto Santos Coli ‘Coliati’ ba postu Brigadeiru Jenerál;
  2. Kapitaun Mar e Guerra Donaciano do Rosário da Costa Gomes ‘Pedro Klamar Fuik’ ba postu Komodoro;
  3. Brigadeiru-Jenerál Domingos Raul ‘Falur Rate Laek’ ba postu Maior-Jenerál no Maior-Jenerál;
  4. Tito da Costa Cristovão ‘Lere Anan Timur’ ba Tenente-Jenerál.

Diskursu husi S.E. Prezidente Repúblika Dr. Francisco Guterres Lú Olo, hatete,

Promosaun sira-ne’ebé hala’o ohin importante tebetebes ba Instituisaun Militár núdar konsekuénsia husi reforma ne’ebé la’o daudaun hela ba reorganiza makroestrutura defeza nasionál, ne’ebé orienta hosi Konseitu Estratéjiku Defeza no Seguransa Nasionál nu’udar matadalan estratéjiku, inklui mós dokumentu estruturante sira seluk hosi estratéjia militár ne’ebé  tama ona faze ikus aprovasaun nian.

Iha aprovasaun Estatutu Militár foun FALINTIL-Forsas Defeza Timor-Leste nian, responsável sira buka adapta ba reforma sira-ne’ebé halo daudaun hodi hadi’a aspetu balun iha estatutu kondisaun militár nian hodi labele sees husi mudansa sira seluk ne’ebé akontese tiha ona.

Estrutura lideransa ba Komandu F-FDTL no Ofisiál Jenerál sira-ne’ebé halo parte hosi estrutura hirak-ne’e tenke iha kbiit atu hatán ba dezafiu ida-ne’e no mudansa sira-ne’e, no tenke iha mós kapasidade no preparadu atu hala’o knaar ne’ebé de’it iha estrutura laran, la’ós de’it iha komponente fiksa maibé mós iha komponente operasionál hosi Sistema Forsas Nasionál.

F-FDTL sei simu tan responsabilidade boot iha rai-laran no iha rai-liur, no tanba instituisaun iha hela faze restruturasaun interna, ita tenke hili duni ba ofisiál jenerál, ofisiál sira-ne’ebé kompetente liu, ho kualifikasaun tékniku-profisionál, esperiénsia no kapasidade komandu, iha rekoñesimentu no prestíjiu iha meiu militár ka sivíl hodi hasoru dezafiu sira-ne’e.

“Tanba ne’e mak ita presiza adapta kuadrus F-FDTL tuir organizasaun nia nesesidade estruturál sira, Ita presiza hanoin klean atu nune’e instituisaun sira bele tetu hikas fali kona-ba sira-nia knaar iha tempu foun ohin loron nian, nakonu ho dezafius no mudansas relasiona ho paradigma Seguransa nian,” dehan Prezidente Repúblika ne’e.

Vizaun kona-ba Forsa Armada ida ne’ebé prontu no ho naran-morin hodi serbí Timor-Leste no seguransa ema hotu-hotu ninian, ezije katak Forsa ne’e tenke hamriik ho ema ne’ebé kompetente no prontu atu serbisu ho laran-haksolok, lidera hosi líder hirak ne’ebé hatene inspira sira no hakoak ema hotu; líder sira ne’ebé bele kontribui ba hasa’e militár ida-idak ninia nível dezempeñu no satisfasaun profisionál, no fó dalan ba ema ida-idak bele afirma ninia an.

Prezidente Repúblika, hafoin simu proposta husi Konsellu Ministrus, iha kompeténsia rasik atu halo promosaun militár sira-nian ba postu ofisiál jenerál no promosaun ofisiál jenerál sira-nian. Promosaun ba postu ofisiál Jenerál no Jenerais bazeia ba Estatutu Militár F-FDTL Foun ne’ebé aporova liuhusi Dekretu-Lei númeru 33/2020, 2 setembru. Tuir Estatu Militár F-FDTL Foun, númeru 1 husi artigu 261 hateten, kargu Xefe Estadu-Maior Forsas Armadas okupa husi militár ida ho postu Brigadeiru-Jenerál ou Komodoro.

Calisto Santos Coli ‘Coliati’ iha fevereiru 2011 promove sai koronel no hahú okupa kargu Xefe Estadu-Maior iha outubru 2018.

Donanciano Gomes ‘Pedro Klamar Fuik’ hetan promosaun ba Kapitaun Mar-e-Guerra iha 2010 no nomeadu ba Diretór Institutu Defeza Nasionál iha 2012.

Domingos Raul ‘Falur Rate Laek’ hetan promosaun ba Brigadeiru-Jenerál iha juñu 2018 no komesa okupa kargu Vise-Xefe Estadu-Maior-Jenerál iha outubru tinan hanesan.

Lere Anan Timur hetan promosaun ba Brigadeiru-Jenerál no okupa kargu Vise-Xefe Estadu-Maior-Jenerál iha novembru 2009. Promove ba Maior-Jenerál no hahú ninia funsaun nu’udar Xefe Estadu-Maior Jenerál F-FDTL iha outubru 2011.

Promosaun ba Donaciano Gomes atu viabiliza oportunidade ba ninia funsaun iha futuru hodi lidera misoins internasionais ba manuntensaun paz ne’ebé organiza husi Nasoins Unidas. Númeru 1 husi artigu 260 Dekretu-Lei ne’e hateten. Vise-Xefe Estadu-Maior-Jenerál Forsas Armadas okupa husi militár ida ho postu Major-Jenerál ou Kontra-Almirante.

Média MD

Deskulpa - Komentariu ami Taka

error: Deskulpa Kontent ami protected !!