MAGAZINE MD#Edisaun_II#Free download.

2018 Selebra Loron FALINTIL Ho Serimónia Simples

DILI: Iha tinan ne’e 2018 selebresaun loron Forsa Armada Libertasaun Independensia Timor-Leste (FALINTIL) bá dala 43 diferente ho tinan hira liu bá, maibé tinan ne’e kestaun orsamentu ne’ebé limitadu ho esforsu Ministériu defeza nian hodi selebra simples maibe ho dignu. Loron importante ida ne’e nu’udar transformasaun luta bá libertasaun ne’ebé harii iha 20 Agostu 1975, FALINTIL konsege kumpri ninia misaun hodi liberta povu no nasaun doben ne’e.

Ministru Defeza Filomeno da Paixão de Jesus hatete, loron ne’e hanesan loron haksolok bá iha Forsa Falintil Defeza Timor-Leste (F-FDTL) ne’ebé mai husi FALINTIL, maske tinan ne’e iha difikuldade osan maibé halo ho di’ak tanbá hetan mós prezensa husi Xefe Ejerse husi Austrália nian no Xefe Estadu Maior Jeneral Portugal nian, no mós prezensa husi ita nia lider importante ho veteranus sira.

“Ami sei aproveita lori loron ne’e hodi fó hanoin bá joven sira no militares sira liu-liu kona-bá valores sira hanesan enkorajen, nasionálizmu, patriotismu, honestidade bá abnegasaun hodi servi rai ne’e,” dehan Ministru bá jornalista sira báinhira partesipa loron FILINTIL iha Kuartel Jeral F-FDTL Fatuhada, Segunda (20/08/2018).

Tuir Ministru Defeza ne’e katak, antes tama bá iha pasajen reforma bá membru antigu veteranus ne’ebé sei hala’o hela knaar nuudar militar iha instituisaun forsa defeza nia laran, tanbá ne’e molok sira atu hakat bá reforma instituisaun iha obrigasaun hasae tan postu deviza bá sira ida ne’ebé maka akontese dadaun báinhira selebra loron FALINTIL tinan ne’e 2018.

“Ohin na’in tolu mak sae tan deviza bá ofisial superior mak hanesan Tenente Koronel Manuel Freitas (Maubuti), Joao Pedro da Silva (Rai-ria) no Higino da Neves (Fragata) ida ne’e hanesan distisaun ida bá sira bá kontribuisaun luta libertasaun nasionál iha tinan 24 nia laran,” tenik Ministru.

Iha fatin hanesan Xefe Estadu Major Jeneral F-FDTL Lere Anan Timur hatete, komemorasaun ne’e importante maski Luta na’in lubuk ida ne’ebé la marka prezensa tanbá dalaruma sira bárak hela iha area rural no bálun mós laiha transporte no bálun preokupa ho serbisu vida agrikultura nian.

“Ha’u hanoin luta na’in sira nia futuru mak oan sira, báinhira la hanoin iha futuru ema seluk mak sei hela fali ho istoria luta nain sira nian no dalaruma luta nain sira nia istoria nia hun sai fali hanesan ema seluk ema leet,” tenik Xefe Estadu F-FDTL.

Tanbá ne’e husu bá ukun nain sira komesa agora halo lei ruma bá destinu veteranu sira nian hodi bele entrega bá oan sira.

 

Kobertura: Ligia Noronha

Deskulpa - Komentariu ami Taka

error: Deskulpa Kontent ami protected !!