Governu Koreia Sul prontu fó apoiu bá Ministériu Defeza

Dili: Iha loron, Sesta  24 Augostu 2018, Ministru Defeza Birgadeiro Jeneral Filomeno da Paixão de Jesus simu enkontru kortezia husi Ambaixadór Korea Sul mai Timor Leste, Sr. Lee Chin  Bum. Iha inkontru ne’e, Ambaixadór Lee Chin Bum kongratula Ministru Defeza no reafirma kompromisu Korea Sul nian hodi fó apoiu bá dezenvolvimentu nasionál Timor-Leste nian liliu komitmentu país refere hodi ajuda iha modernizasaun F-FDTL.

Ministru Defeza apresia apoiu tomak husi Korea Sul durante ne’e no iha tempu badak sei iha diskusaun liután entre Ministériu Defeza no Ambaixada Repúblika Korea Sul iha Timor-Leste kona-bá área espesífika sira ne’ebé Timor-Leste hakarak Korea Sul atu fó tulun no apoiu. Ambaxadór Korea Sul mós informa bá Ministro katak, sira prontu atu fó apoiu bá F-FDTL, liuliu iha mapamentu satélitu. Tuir Ambaxadór, nia rasik nu’udár eis jeneral ida ne’ebé iha esperiensia barak iha mapamentu militar Korea Sul nian.

Responde bá diskusaun ne’e, Ministro mós informa bá Ambáxador Korea Sul katak, iha tempu bádak sei estuda no haree hela nessesidade no prioridade saida mak Ministériu Defeza presiza. Tuir Ministro, alende mapamentu satélitu, VIII Governo Konstituisional mós hanoin ona atu estabelese Sistema Alerta Nasionál iha téritoriu tomak. Sistema ne’e la’os atu haree deit kestaun funu, maibé mós alerta komunidade no populasaun bainhira mosu dezastre naturais ruma. Nune’e, Ministériu Defeza mós sei konsulta ho Governo Korea Sul atu haree posibilidade kapasitasaun rekursu umanu, liuliu formasaun militar no sivil iha área militar.

Governo Korea Sul rasik apoiu Timor-Leste hahu kedas iha tinan 1999 to’o sira nia misaun remata iha 2002. Sira mós partisipa iha misaun forsa paz Nasaun Unidas durante hala’o serbisu iha teritóriu Timor-Leste hanesan Lospalos, Manatuto, Dili no Oecusse. Sira mós fó kontribuisaun lubuk ida bá estabelesementu seguransa inklui mantein paz iha fronteira Oecusse. Forsa Korea rasik mate iha rejiaun Oe-cusse durante hala’o misaun paz no humanitária. País rua ne’e estabelese tiha ona relasaun ida metin no iha kompromisu atu haluan no hametin liután relasaun ne’e iha nível bilateral, rejional no globál.

Deskulpa - Komentariu ami Taka

error: Deskulpa Kontent ami protected !!