MAGAZINE MD#Edisaun_II#Free download.

Ministru Defeza Relata Atividade Servisu Bá PR Lú-Olo

DILI: Iha loron 11 Setembru 2018, Ministru Defeza Brigadeiro Jeneral Filomeno da Paixão de Jesus relata atividade servisu Ministériu Defeza (MD) no Ministériu Interior (MI) nune’e mós atividade sira husi Falintil Forsa Defeza Timor-Leste (F-FDTL)  no Polísia Nasionál Timor-Leste (PNTL) nian bá Prezidente Repúblika Brigadeiro Jeneral Francisco Guterres Lú-Olo.

Tuir Ministru Defeza Brigadeiru Jeneral Filomeno da Paixão de Jesus katak, agora dadauk ministériu rua inklui forsa rua idaidak hala’o nafatin nia kna’ar ho di’ak hodi hein OJE 2018 ne’ebé aprezenta ona bá Prezidente Repúblika.

“Ha’u mai halo relatóriu bá Prezidente Repúblika kona-bá atividade Defeza no Seguransa ne’ebé liu semana ida ona hau seidauk informa bá Prezidente, tanbá ha’u iha hela Parlamentu Nasionál hodi akompaña OJE 2018 durante ne’e. Ha’u mai informa kona-bá atividade iha ministériu rua ne’e nia laran inklui mós atividade F-FDTL ho PNTL nian,” dehan Ministru ne’e bá jornalista sira hafoin remata enkontru semanal ho PR Lú-Olo iha Palasiu Prezidensial Báiro Pite.

Alende ida ne’e, Ministru ne’e mós informa katak, governu hamutuk ho F-FDTL no PNTL sei halo kontrolu makaas bá atividade negosiu ilegal iha área fronteira Timor-Leste nian. Ministru informa bá Prezidente da Repúblika katak, parte Migrasaun no Alfândega mós kontinua koopera ho fronteira rua hodi halo kontrolu makas bá ema sira ne’ebé tama sai no halo atividade negosiu illegal. Ministro afirma katak, Governo kontinua garante establidade nasaun nian, inklui mós kontrola ita nia fronteira rai, liuliu iha negoziu no pasagem diarial ema nian.


Kobertura: Ligia Noronha

Deskulpa - Komentariu ami Taka

error: Deskulpa Kontent ami protected !!