MAGAZINE MD#Edisaun_II#Free download.

MD Husu Tenke Tau Atensaun Aas Ba Feto TL

Oekuse: Relasiona ho selebrasaun loron mundiál feto ne’ebé monu iha loron 8 fulan Marsu Ministru Defeza no Ministru Interior Interinu Brigadeiru Jenerál (Ref) Filomeno da Paixão de Jesus hodi partesipa iha Reijaun Administrativa Espesiál Oekuse Ambenu (REOA), iha eventu ne’e Ministu husu atu tau atensaun aas ba feto Timor- Leste nune’e bele kontribui makas ba dezenvolvimentu.

“Feto mak ita nia inan feton iha kultura tinan hirak liu ba ita la tau importánsia no agora ita haree iha globalizasaun lao ba oin ita presiza fó atensaun ba ita nia inan feton sira, labele fó aspeitu valór fizíku de’it, ita haree liu ba karakter sira fó tebes sira nia kontribuisaun makas tebes ba dezenvolvimentu,”dehan Ministru Defeza liu husi diskursu iha edifisiu PNTL Oekuse Sesta-Feira (8/03/2019).

Ministru haktuir, tempu ikus ne’e feto barak okupa laos de’it domestíka maibé halo parte to’o tama iha organizasaun hodi okupa iha área sira ne’ebé aas. Tanba ne’e to’o ona tempu muda konseitu kona-bá inan feton sira no sira merese respeitu tuir tradisaun husi violnesia domestika ne’ebé mosu no agora rezista nafatin haree katak respeita ba inan feton sira ne’e sei menus tebes.

“Ita presiza hola atensaun ba ida ne’e husi respeitu ne’e mak ita bele tau sira iha fatin ne’ebé aas, ita haree agora ema komesa tau aas feto ba bebeik,”tenik Ministru.

Iha fatin hanesan Repzentante Sekretaria Estadu Igualdade no Inkluzaun Sra. Odilia Ung Martins hatete, loron ida ne’e hatudu luta feto sira nian iha aspeitu ekonomia polítika sosiál no kultura.

loron ida ne’e hanesan oportunidade ida atu promove atu buka dalan foun hodi halakon bareira no halais progresu ba igualdade jeneru no hakbi’it feto no labarik feto sira.

“TL hahú hala’o ona progresu kuadru legal oinoin atu atinzi igualdade jeneru hodi hakbiit feto hodi komprova liután iha kumprimisiu husi esforsu barak tebes hodi dezenvolve lei polítika no planu programa hirak ne’ebé sensivél ba jeneru atu fasilita dezenvolvimentu ne’ebé pozetivu hodi ambiente ne’ebe livre husi diskriminasaun,”tenik Sra.Odilia.

Tanba ne’e SEII fó parabens ba PNTL hodi hakbiit feto hodi promove iha instituisaun no fornese ona prestasaun serbisu ne’ebe di’ak ba vitíma husi violensia bazeia ba jeneru liuliu violensia domestika iha teritorium tomák, bainhira nasaun ne’e mak livre hsui violensia sei iha impaktu pozetivu iha kapasidade serbisu feto sira nian no sira nia partesiapsaun sei rezulta ho benefisiu bo’ot tebes ba dezenvolvimentu nasaun nian.

Atividade iha serimónia ne’e abertura ho long march hahú husi Aerportu to’o edifisiu PNTL Oekuse ne’ebé ho distansia kuaze kilometru lima (5KM).

Antes hahú serimónia Ministu Defeza hamutuk ho Prezidente Autoridade (RAEOA) no (ZEEMS) Señor Mari Bin Amude Alkatiri hala’o inagura edifisu sentru treinamentu ba PNTL. Hetan partesipasaun husi membru Parlamentu Nasionál (PN), korpus diplomátiku, reprezentante organizasaun sosiadade sivil, hamutuk mós ho Estudante no Populasaun sira, eventu refere anima ho dansa Zumba no selu tán husi grupu balun no Polísia.

kobertura: Ligia Noronha

Deskulpa - Komentariu ami Taka

error: Deskulpa Kontent ami protected !!