MAGAZINE MD#Edisaun_II#Free download.

Ministériu Defeza Hahú Deskuti Planu Programa Estratéjiku 2019-2023

DILI:  Estrutura Ministériu Defeza hamutuk ho asesor sira hahú deskuti ona planu programa estratéjiku 2019-2023, husi deskusaun atu haree mekanizmu operasionál planu estrateziku dezenvolvimentu (PED) 2011-2030 no programa VIII Governu Konstitusionál.

Objetivu mak atu identifika prioridades hodi hadi’a no hametin koordenasaun serbisu inter-ministeriál, atu planeia, koordena,implementa no monitoriza programa VIII Governu Konstitusionál nian nune’e atinji tarjeitu ne’ebé iha.

Durante deskusaun ekipa elabora hamutuk hanoin hodi hamosu programa foun balun iha tinan lima (5) nia laran nune’e bele atinji tarjeitu, iha deskusaun ne’e mós involve Unidade Planeamentu Monitorizasaun no Avaliasaun (UPMA) ne’ebé tutela iha gabinete Primeiru Ministru hodi fó mós sira nia ideia.

Tanba ne’e iha Sesta-Feira ekipa konklui uluk programa no planu  ba tinan 2020 hodi aprezenta ba Ministru Defeza Brigadeiru Jenerál (Ref) Filomeno da Paixão de Jesus sei lori ba iha Ministériu Finansas hodi halo deskusaun ne’ebé klean liu-tán.

Ministru Defeza mós aseita ho programa ne’ebé aprezenta husi ekipa tékniku maibé ministru husu nafatin ba ekipa sira atu haree no tetu halo didi’ak  programa sira ne’e.

“Ba programa sira ohin imi aprezenta tama hotu ba programa VIII Governu konstitusionál, tanba ne’e haree didi’ak ida ne’ebé preoridade liu hodi bele atinji ba tarjetu ne’ebé iha,” dehan Ministru Defeza bainhira partesipa iha deskusaun ne’e iha Salaun Enkontru Ministériu Defeza Fatuhada, Sesta-Feira (24/05/2019).

Iha fatin hanesan Diretór Jerál Asuntu Polítika Defeza no Kooperasaun Internasionál Sr. Armindo Junior Moniz dos Santos hatete, tuir planu VIII Governu nian Ministériu Defeza tau konsiderasaun maka’as atu fó apoiu ba instituisaun FALINTIL-Forsa Defeza Timor Leste (F-FDTL) iha rekursu umanu no hadi’a kondisaun infrastutura báziku atu dezenvolve forsa la’o di’ak liu-tán.

 “Ami hahú deskute programa preoridade ba tinan 2019-2023 ne’ebé sei foka liu-ba moris di’ak forsa nian tuir politika VIII governu,” dehan Diretor Jeral ne’e.

Iha deskusaun ida ne’e ekipa deskute mós dezafiu no programa sira ne’ebé aprezenta fali ba Ministériu Defeza hodi hato’o tutan ba Ministériu Finansas no Unidade Planeamentu Monitorizasaun no Avaliasaun (UPMA), depois sei aprezenta ba Konsellu Ministru.

Kobertura: Ligia Noronha
Foto: Gil de Jesus

Deskulpa - Komentariu ami Taka

error: Deskulpa Kontent ami protected !!