MAGAZINE MD#Edisaun_II#Free download.

Governu Sei Dezenvolve Makas Iha Kosta Súl

DILI: Relasiona ho vizita kortezia husi Almirante YU Wenbing husi Forsa Naval Repúblika Popular Xina mai Ministru Defeza no Ministru Interior Interinu Brig-Gen (Ref) Filomeno da Paixão de Jesus iha sala kortezia. Iha vizita  ne’e, Ministru Defeza partilla informasaun kona-bá prioridade polítika defeza liliu planu hodi estabelese sistema autoridade marítima integrada.

“Governu Timor-Leste sei hala’o dezenvolvimentu maka’as iha Kosta Súl hafoin delimitasaun fronteira ho Austrália, seguransa marítima sai nu’udar priordade boot tebes, governu sei harii Portu Naval Hera no sei prepara rekursu umanu nune’e Timor-Leste bele iha kbiit hodi mantein seguransa iha tasi,”dehan Ministru Defeza ne’e bainhira simu vizita kortezia iha Ministériu defeza Tersa-feira (8/10/ 2019).

Ho nune’e Ministru Defeza mós agradese ba apoiu no asisténsia tomak husi Xina. Lasu amizade entre Timor-Leste ho Xina ne’e metin liután tanba Xina dezde uluk sempre fó apoiu ba Timor-Leste nia luta ba independénsia.

Ho oportunidade ne’e  Ministru hato’o mós pedidu ba Governu Xina liuhusi Almirante Yu Wengbing atu kontinua simu nafatin kadete husi F-FDTL atu ba frequenta kursu iha akademia naval Xina. Almirante hato’o bem-vindu ba pedidu ne’e no reitera prontidaun Xina nian hodi kontinua hametin parseria iha setor defeza ho Timor-Leste.

Almirante hato’o mós agradesimentu ba Ministru no povu Timor-Leste tambá simu ona sira-nia vizita mai Timor-Leste. Almirante haktuir kona-bá lasu istóriku entre Timor-Leste no Xina no reafirma kompromisu Xina nian hodi habo’ot no hametin liután lasu no parseria defeza no país amigo Timor-Leste.

Média MD

Deskulpa - Komentariu ami Taka

error: Deskulpa Kontent ami protected !!