KM Aprova Dekretu Governu Kona-ba Medida EE

DILI: Liu husi enkontru Konsellu Ministru estraordinariu iha Sesta-feira 29 Maiu 2020, aprova ona dekretu governu ne’ebé aprezenta husi Primeiru Ministru Taur Matan Ruak, kona-ba medida ezekusaun atu renova deklarasaun estadu emerjénsia (EE) ne’ebé efetua husi Prezidente Repúblika nian No.35/2020 iha loron-27 Maiu hodi hatan ba pandemia KOVID-19.

Estadu Emerjensia ne’e abrajen ba territoriu nasionál tomák vale ba iha óras 00:00 iha loron-28 fulan Maiu 2020 no sei remata iha oras 23:59 iha loron-26 fulan Juñu 2020. Maibé, kona-ba dekretu governu n°. 8/2020 loron-30 fulan Abril nian, sei mantein medida hirak kona-ba sirkulasaun internasionál no Primeiru-Ministru mós bele fó autorizasaun esesionál atu ema estranjeiru bele tama mai território nasionál, ba kazu ruma ne’ebé tenke fundamenta duni, kona-ba laborasaun ba empreza sira. Maibé, Estadu Emerjénsia (EE) ba datoluk ne’e sei kontinua mantein medida hotu ne’ebé uluk ba hatuur ona liuliu, kona-ba oinsá halo kontrolu sanitáriu ba ema sira ne’ebé tama no sai iha territóriu nasionál no sirkulasaun iha territóriu nasionál no fiksasaun rezidénsia. Tanba ne’e liuhusi despasu, Ministru interior Interinu bele determina atu temporariamente taka lai postu fronteira sira.

Aleinde ne’e mós kona fali ba medida ba administrasaun públika, iha dekretu governu hateten, servisu públiku tenke funsiona normál no atu halo ida-ne’e tenke asegura katak halo distánsia mínimu metro ida ho balu entre indivídu no tenke uza máskara protesaun no fase liman molok tama ba espasu públiku sira.

Haree fila fali ba iha parte estabelesimentu ensinu pré-eskolár, ensinu báziku, ensinu sekundáriu, ensinu superior no formasaun profisionál ka tékniku-vokasionál bele realiza filafali ona atividade letiva sira liuhusi rejime prezensiál, naran katak kumpri norma téknika ne’ebé sei aprova husi Ministériu Saúde, Ministériu Edukasaun, Juventude no Desportu no Ministériu Ensinu Superiór, Siénsia no Kultura. Ho dekretu-lei ne’e sei mantein regra hotu atu halo asesu no permanénsia iha resintu sira merkadu nian no sei hasai limitasaun hirak ne’ebé relasiona ho atividade ekonómika privada. Sei la limita tan ona atividade relijioza, desportivu no direitu atu halo greve ka manifestasaun.

Kobertura: Ligia Noronha/ Gil Barros

Deskulpa - Komentariu ami Taka

error: Deskulpa Kontent ami protected !!