MAGAZINE MD#Edisaun_II#Free download.

Governu Aprova Ona Proposta Rezolusaun Ba PN Kona-ba Serbisu Aéreu TL- Austrália

DILI: VIIIGovernu Konstitusionál ne’ebé lidera husi S.E Primeiru Ministru (PM) Taur Matan Ruak, liu-husi enkontru Konsellu Ministru (KM) ohin 22 Jullu 2020, aprova ona projetu kona-ba Proposta Rezolusaun ba Parlamentu Nasionál, ne’ebé aprezenta husi Ministra Negósius Estranjeirus no Kooperasaun, Sra. Adaljiza Magno, kona-ba ratifikasaun Akordu kona-ba Serbisu Aéreu entre govenu Timor-Leste no governu Austrália.

Akordu ida-ne’e ninia objetivu maka atu asegura liután nivel seguransa no protesaun internasionál, hodi reafirma ninia preokupasaun séria ba hahalok no ameasa kontra seguransa aviaun sira-nian, ne’ebé fó risku ba ema no propriedade nia seguransa, afeta maka’as ba funsionamentu transporte aéreu nian no konfiasa públiku nian ba seguransa aviasaun sivil nian.

Akordu ida-ne’e buka mós atu promove sistema aviasaun internasionál ida-ne’ebé bazeia ba konkorrénsia entre empreza transporte aéreu nian sira iha merkadu, hodi enkoraja empreza sira-ne’e atu dezenvolve no implementa servisu hirak ne’ebé kompetitivu no inovadór.

Aleinde ne’e mós membru Konsellu Ministru asiste aprezentasaun rua husi Ministru Prezidénsia Konsellu Ministrus, Sr. Fidelis Manuel Leite Magalhães, kona-ba orsamentu tuir programa no kona-ba mekanizmu sira atu halo koordenasaun no monitorizasaun ba implementasaun husi reforma institusionál sira.

Orsamentasaun tuir programa ne’e ninia objetivu mak atu promove transparénsia iha alokasaun rekursu tuir prioridade nasionál sira, no permite alkansa rezultadu hirak ne’ebé ita hakarak no estabele responsabilizasaun ba rezultadu hirak ne’ebé prodús ona. Kona-ba koordenasaun no monitorizasaun ba implementasaun husi reforma institusionál sira ne’ebé Governu implementa daudaun ho objetivu atu hadi’a jestaun no funsionamentu setór públiku nian, nune’e mós asegura katak Estadu funsiona iha kuadru legalidade no seguransa jurídika efetiva ho dalan ne’ebé efisiente no efikás liu.

 Dezenvolve liuhusi área prinsipál lima, reforma institusionál boot sira maka reforma administrasaun públika, reforma jestaun finanseira públika, desentralizasaun administrativa, reforma lejizlativa no reforma judisiária. Aprezentasaun ne’e ninia objetivu maka debate mekanizmu koordenasaun nian sira kona-ba reforma boot lima.

Tanba medida hirak ne’e interligada no partilla objetivu komún ida, presiza atu koordena, iha nivel ne’ebé aas liu, ninia dezenvolvimentu, implementasaun no monitorizasaun, liu-liu ho kriasaun komisaun koordenadora ida, ne’ebé funsiona hanesan órgaun xapeu ba koordenasaun kona-ba reforma oin-oin, ne’ebé prezide husi Primeiru-Ministru no integra husi Ministru sira- ne’ebé sai nu’udar responsavel atu estabelese diresaun no vizaun jerál husi reforma no programa sira, koordena dezeñu, programasaun no implementasaun konsistente husi reforma sira, promove sinerjia no kooperasaun entre reforma sira, hasai obstákulu no sobrepozisaun entre reforma sira, fó apoiu ba reforma sira no garante dezempeñu di’ak no implementasaun oportuna husi reforma sira.

Kobertura: Ligia Noronha/ Gil Barros

Deskulpa - Komentariu ami Taka

error: Deskulpa Kontent ami protected !!